Зориулагдсан орчинд л комеди тоглолт "амьтай" болдог
- Studio Loft
- Mar 11, 2022
- 2 min read
Updated: Apr 7, 2022
UB Comedy Club
Area: 350m2
Usage: Comedy Club
Date: 2018
Location: Ulaanbaatar, Mongolia
Studio Loft компанийн үүсгэн байгуулагч
Г.Билгүүдэй:
Комеди клубын интерьерийг хийх нь бусад төслүүдээс хэр ялгаатай байсан бэ?
Мэдээж манайд өмнө нь ийм хэмжээний комеди клуб байгаагүй учраас дотоодоос санаа авах зүйл байгаагүй. Стэнд-ап комеди маань Америкаас үүсэлтэй урлаг. Тиймээс яг тэндхийн клубын интерьерийг судлаж үзээд, ерөнхий дизайны санаагаа гаргасан. Үүн дээр нэмээд "UB Comedy" клубын өөрийнх нь лого, өнгө төрхийг тод харуулахыг зорьж ажилласан. Стэнд-ап комеди үзэх шинэ соёлыг бий болгож, тохирсон орчныг бий болгохын төлөө хичээсэн болохоор надад их шинэлэг санагдсан.
Засварын үйл явц хэрхэн өрнөсөн бэ?
Сант асар маань Улаанбаатар хотын түүхэн барилгуудын нэг гэдгээрээ онцлогтой. Тиймээс уг барилгын ерөнхий хийц буюу багана, дам нуруу, цахилгаан сүлжээ гэх мэт үндсэн өгөгдөлд тохируулан комеди клуб ажиллахад тохиромжтой болгохын тулд засварын ажлыг өрнүүлсэн. Зарим ханыг нурааж томруулаад заалны орц гарцыг шинээр хийсэн байгаа.
Өнгө төрхийн хувьд хэд хэдэн удаа ярилцаж, рендер зургаа 2,3 удаа өөрчилсөн байдаг. Яг тийм чиг хандлагатай гэж тодорхойлохоос илүүтэй олон дизайны элементийг нэгтгэсэн. Зарим талаараа Америкийн жазз хөгжмийн клубыг санагдуулж магадгүй юм. Учир нь тайзыг комеди клубуудэд байдаг нийтлэг хэмжээнээс арай том хийсэн.
Онцлог болгож тусгайлан хийсэн деталь бий юу?
Нарийн инженерингийн тал дээр илүү мэргэжлийн байлгах гэж зорьж шийдсэн нь онцлог юм болов уу. Жишээ нь, дотор тоглолт үзэж буй хүмүүсийн дуу гадагш тардаггүй бөгөөд гаднаас бас ямар нэгэн шуум орж ирэхээргүй болгох, комедианы яриа тод сонсогдох, олон хүн сууж үйлчлүүлэх учир агааржуулалтыг хангалттай хэмжээнд шийдэх гэх мэт.
Мөн гэрэлтүүлгээр дамжуулан одоо тоглолт эхлэх гэж байна, эсвэл тоглолт дууслаа гэх мэт тэр орчны шилжилт ялгааг мэдрүүлэхийг хичээсэн юм. Өөрөөр хэлбэл, энд байгаа гэрэлнүүд орчныг гэрэлтүүлэхээс гадна орчин солигдож байгаа ялгааг хүмүүст мэдрүүлэх мөн интерьерт декор болох гэсэн гурван үүрэгтэй.
Comments